Måndag:
Apollon
Tid: 19.00
Kva: musikkviss
Neste kviss: 27. april (annakvar måndag)
Stoff har ikkje fått moglegheit til å teste, men møtte kvissmastar Casper på Nobel Bopel-kvissen, og likte han godt.
Andre måndagskvissar:
Opera
Tid: 19:00
Inngang: 60 kroner pr. person
Neste kviss: kvar måndag og fredag. Les meir under fredag.
Ølpris: 114 kroner
Tysdag:
Litteraturhuset i Bergen
Tid: 19.30
Kva: litteraturkviss, så klart
Vanskegrad: 8/10
Inngang: 50 kroner pr. person
Neste kviss: 5. mai
Premie: billettar til litteraturhuset eller twist
Ølpris: 96 kroner
Stoffs plassering: 5. plass
På denne kvissen har du godt av å kjenne ein littvitt-student. Den er vanskeleg. Men stemninga er god, klientellet av det eldre slag. Kvissmasteren kunne fortelje at han hadde seks års fartstid i kvissmasterbransjen. Ja, han var flink, han. Fekk oss «unge» til å føle oss velkomne. Trass i sine åtti spørsmål, blei kvissen effektivt gjennomgått (til tider for effektivt?), og varte i normal kvisstid.
Stoffs lag fekk kjeft då det sjette lagmedlemmet sat seg ved bordet, vi tør ikkje eingong å tenke på kva motstandarane tenkte då vi på eit tidspunkt var ni spelarar. Maks fem personar per lag der, altså. Utanom litteratur var det ei rekke spørsmål om teater, nokre om norrøn mytologi, litt musikk (inkludert ei lytteprøve) og ei bileteoppgåve (med bilete av litteraturfolk).
Andre tysdagskvissar:
Kvarteret
Tid: 19.00
Neste kviss: kvar tysdag
Inngang: gratis
Ølpris: 59 kroner for studentøl
Statsraaden
Tid: 19.00
Neste kviss: kvar tysdag
Inngang: 60 kroner per person
Premie: «fine premier fra baren»
Dr. Wiesner
Tid: 19.00
Neste kviss: 5. mai (annankvar tysdag)
Kva: «i det mer folkelige segmentet»
Ølpris: 118 kroner
Generelle tips:
- Det kan hende premiene varierer, ikkje skyld på Stoff om du blir skuffa.
- Sjekk alltid på internettet om kvissen faktisk går den dagen du skal.
- Ikkje gå på kviss kvar dag.
Onsdag:
Ad Fontes
Tid: 20.00
Vanskegrad: 5/10
Inngang: 10 kroner per person
Neste kviss: kvar onsdag
Premie: billettar til filmharmonien og gåvekort på Numero Uno
Ølpris: 59 kroner
Stoffs plassering: 1. plass
Ein heil kategori om Erik Bye. Spør du Stoffs utsende er det for mykje Erik Bye. Jaja, det er vel sånn det går når du lar vinnarane av førre kviss velje kategoriane. It is ålso very suitable for ju inglish spikers, jess jur welkåm.
På toalettavisa til Humanistisk Studentutvalg står det om Ad Fontes-kvissen:
Du kom, du tapte, du kom igjen.
I Stoffs magasin #84 står det om den same kvissen:
Vi kom, vi vann, vi kjem nok ikkje igjen.
(Merknad: Stoff sitt lag hadde sju spelarar, sjølv om maksgrensa er på fem. Altså ingen premie til oss. Buhu, kva var vitsen då?)
Andre onsdagskvissar:
Falske Reker
Tid: 19.00
Neste kviss: kvar onsdag
Ølpris: 118 kroner
Elefanten
Tid: 19.00
Neste kviss: kvar onsdag
Torsdag:
Realistforeningen på Kvarteret
Tid: 19.30
Kva: musikkviss
Vanskegrad: 5/10
Inngang: gratis
Neste kviss: plutseleg!
Premie: konsertbillettar til 1. plass, sjokoladeplate til 2. og 3. plass
Ølpris: 60 kroner for studentøl
Stoffs plassering: delt 3. plass
Om du saknar tenårene, kan du kanskje finne litt av den stemninga her. Mange lag med mange folk. Nokre av jentene baki lokalet var litt masete. Mange albumanbefalinger, det var jo kjekt. Den eine kategorien var «Kven har Mette Marit tatt plassen til?» der Den Høgvørde Kronprinsessa var plassert på ulike albumcovere, det var artig – og overraskande vanskeleg.
«Sigmasuckers» kom på sisteplass, det freistar å seie at det var vel fortent.
Nobel Bopel
Tid: 19.30
Vanskegrad: 8/10
Inngang: 50 kroner per person
Neste kviss: kvar torsdag
Premie: valfri kaffi + blings til 1. plass, valfri kaffi + bolle til 2. plass, valfri kaffi til 3. plass
Ølpris: 94 kroner
Stoffs plassering: 4. plass
Hyggeleg, hyggeleg, hyggeleg. Her kan du dra viss du vil på ein … hyggeleg kviss. Solid (bergensk) kvissmaster. Kanskje den kvissen med størst alderspenn av dei vi har vore på i denne guiden. Tidvis veldig vanskelege spørsmål, men kategoriene spriker mellom alle tema, så noko kan du garantert. Denne gongen blei det delt ut eit kryssord som også skulle svarast og gis poeng for, veldig kjekt.
Andre torsdagskvissar:
Bergen offentlige bibliotek
Tid: 18.00
Kva: filmkviss
Neste kviss: plutseleg!
Bergen Camping
Tid: 19.00
Kva: popkulturell kapital kviss …???
Neste kviss: av og til liksom? Som oftest på onsdagar
Fredag:
Opera
Tid: 19.00
Vanskegrad: 7/10
Inngang: 60 kroner per person
Neste kviss: kvar måndag og fredag
Premie: mat- og drikkebongar på Opera
Ølpris: 114 kroner
Stoffs plassering: 1. plass (for u30)
Kjenner du på at du har mykje overskot ein dag kan dette vere staden å dra. Mykje gruble-spørsmål. Eksempel: Ein hundrase, eit utdøyande yrke og noko du har gjort i dag, kan alle omtalast med same ord. Svar: setter. I tillegg til den enorme tankekapasiteten som krevst for å løyse slike knuter, er Opera-kvissen også ei sosial øving. Kvissmasteren er svært (altså: veldig) hjelpsam på spørsmål. Til tider litt for hjelpsam. Til tider kanskje litt plagsamt. Men han er hyggeleg, altså! Eigen pall for lag under 30 år gir ekstra sjans for gratis mat. Den var god.
Laurdag:
Gjer noko anna enn kviss i dag, du har fortent det. Dessutan er det ingen kvissar (Stoff kjent) på laurdagar.
Søndag:
Hectors Hybel
Tid: 19:00
Vanskegrad: 5/10
Inngang: 30 kroner per person
Neste kviss: kvar søndag
Premie: billettar til Cinemateket, 500 kroner på Fangene på Fortet og inngang til neste kviss
Ølpris: 63 kroner (?)
Stoffs plassering: 2. plass
No har det vore mykje kviss på ei veke. Litt sliten kanskje. Treng kanskje ikkje drikke øl kvar dag, sjølv om det er kviss. Men det er jo så billig med øl på Hectors. Javel, då, berre eit glas til.
Det er visst to kvissmasterer på Hectors Hybel som byter på kven som tar kvissane. Stoff har berre møtt han eine av dei. Upåklageleg humør på han. Austlending. Berre tre lag med på kvissen og likevel så positiv. Vanlegvis er det visst oppimot ti lag, Stoff har kome på feil søndag, altså. Spørsmåla var også heilt fine. På siste del var alle hjelpemiddel tillate. Det må vere første gong eg har blitt oppfordra til å bruke mobil på kviss. Søndag er jo ofte ein dag med mykje lediggang, det er fint at Hectors Hybel kan vere rota til noko godt.